SIMEIKHU KARTIN CHHUAK THINGSULTHLIAH

Dt. 30 March 2013 (INRINNI) PHEK- 2

editorial :

LUNGAWINA TLANG

NILAINI-AH
Tunkar issue hi kan lo ngaihtuah lawk lova. Good-Friday kar anih avangin kan News hi Nilaini-ah chhut a ngai tih kan hre thut a. News pawh duh angin kan lawrkhawm hman ta lo. Kan sawi fo tawh angin, Simeikhu hi kartin Ningani-ah kan chhu thin a, Zirtawpni-ah Aizawl lamah kan thawn thla thin. Tunkar zirtawpni hi Good Friday anih avangin Aizawl Dawr te an khar mai bakah Sumo service pawh a awm lova. Chuvangin, tihchhuah loh ringawt chu ni thei lova kan hriat avangin nilaini zanah kan che ta rum rum a ni. News tih khahna kan neih mai loh avangin englai pawha Article ziak nghal zung zung thei kan phone a, a ziak a, zan dar 10:00-ah min rawn pe a, kan lawm khawp mai.

- Lh.Sailo Kamkeuna: Tun tum chu a hunin a zir em a, tum dang ang lo takin kalvari tlang lam i'n hawi daih teh ang. He chanchinbu phek mawi tur hian he thuziak hi a inhmeh ang em tih ka hrethiam chiah lo nain, Pa lungawina tlang khan ka lairil min fan tlat a, chuvang chuan lungawina tlangah lawnpui che ka tum ve ta a nih hi! Mahse, kawr ruam leh phaizawl kal pela tlangchhip ka panpui dawn miau che avangin tha leh zung i sen ve a ngai dawn a ni tih inhria ang che. Chu kawngah chuan hling te, thang te, manganna leh tahna te, phurrit leh natna hial pawh i tawk thei; a ni, chhingmittui far khat tak ngial pawh a man sanzia i man pha ve mahna le. Manganna vawrtawp Nang leh kei vangin Gethsemane huanah lungngaihna vawrtawp a tuar a, thlan thisen far khawp hialin a rum asin; lei leh van lal meuh pawhin thihna hmachhawn kher zawng a lo huphurh nangiang mai le. Venpuitu a mamawh em em laiin zirtir laktlak loh te venpuitu a la ni ta zawk a! Tanpui ngaia rum vawng vawng khan puithiam lal bawih beng hloha zawk chu a la tanpui ta hram nia! I chun leh zua te chu lungngaihna vawrtawp tuarin in run chhungah an rum mek asin, nangmah vangin! Manganna thlantui far chu chhingmittui farin a luahlan zo va, buai leh hlauhawm laka venpuitu tura an beisei ngeia kha i nungchang avangin an venpui ta zawk si che a! I ban tha chak tak hmachhuan ngeia i tanpuina nghaka an thlir reng lai chein tanpui i ngai ta zawk si a, i tel lova manganna vawrtawp hmachhawn hi an zuam lo asin! Anchhedawng Ngai teh, thih leh dam fawmkem tak meuh meuhin a thihna tur kawngtum chu a zawh a, anchhe dawng kros chu amah ngeiin a pu asin! Chu krosah ngei chuan zangpharin an khaikhang a, a ni, saruakin, saruak tak meuh meuhin! Chutah ngei chuan chatuan thlenga chikchho tur tuinunglui neitu chu dangro dangcharin a tui a hal ta tlat mai le! Hmuh theih loh Thlarauthianghlim Fa taksa atang ngei chuan hmuh theih thisen leh tui a lo luang chhuak a. Thisen man to tia an sawi huai huai chuan man a nei ta lo. A thlawn a ni, a thlawn! Thlantui leh mittui pawh ui thei lovin i thatna turin hmuhsitna kawngtum chu an zawh a. I anchhia, nangma anchhia ngei kha phurin zakin an rum asin! I saruak zahmawh a lan lohna tura sumpai an khawl leh peipun zawng zawng chu i hrawkhrui tihtlai nan i chheprelh zo va, saruakin i awmtir ta a ni ta ber e! Tuinunglui neitu meuh pawh a dang a char chuan a nei lotu zawk i chun leh zuate chu engtiang takin ro dangchar ang maw? Ka ngaihtuahpui ngam lo che. Hmuh theih loh hmangaihna thahrui chu hmuh theih taksaah lo langchhuakin, mawina zawng zawng hnuchhawnin a vuai zawr zo ta. I anchhia reng a na lua e! Thihna hnehtu Tin, heti hi a ni a, mitthi khawkulh kawngkhar meuh pawhin a ngam loha kha, a fam ta! Thlan rimchhia atanga Lazara kaithotu ngei khan thlan rimchhia a bel ve ta tlat mai le! A hrehawm tawrhna zawng zawng atanga chhandamtu mamawh em ema khan midang a chhandam ta zawk si a! Ngaiteh, a thi a, a tho leh ta!. Chung vanrial rum ri leh thlipui rawva ber ber pawhin a tihnghin zawh loh, ral leh hmelma pawhin an rumthaih zawh loh khawpa tuarchhel i chun leh zuate chu nangmah vangin an tuar a zuau mek a nih hi! Thihna thlanthim khur hneh lo va an liam thleng em ni i nghah ve kher dawn? Chhandama i awm theihna a nih dawn phawt chuan thihna tur chu an intulh mawlh ang. Mahse, hei erawh hria ang che: An tho leh tawh lo ang. Lungawina tlang chu Anchhedawng, mite hmuhsit leh endawng ni thin chu A fapa mal neihchhun thihna a nih miau avangin tlang naran a ni ta lo. Tih tur a tuk zawng zawng lungawi taka hlen chhuak zovin thihna chu hnehin a awm ta a, Pa lung a awi ta si! I chunga tihtur an tuk che kha lungawi takin hlen chhuak la, nangmaha thihpui ngai chu thihpui la, thawh lehna nun nen tho lehin khawvel thar chu hmang la, i chungah, nangma chung ngeiah i chun leh zuate lung chu a awi tawh dawn si a!

KANGMEI ATAN HMA LA Tunkar nilaini zingkar khan Kangmei laka kan him zawk nan Thingsulthliah H/A MUP leh MHIP hruaitute chhungtin te Inah kalkualin Inchhung leh pawn lama Vawkchaw chhumna an neih te an endik a. Fimkhur leh zuala mei chhem tur leh kangmei laka kan him tlanna tur kawng te an kawhhmuh zel a ni. SAD NAUPANG KHAWMPUI Aizawl East Bial Hmar tlangdung Seventh Day Adventist Naupang Khawmpui chu Khawruhlian SDA Biakinah ni 29 31 March 2013 hian neih mek a ni a. Thupui- I nu leh pa chawimawi rawh tih a ni a, Thupui sawi tur hian Pastor pahnih ruat niin Children Ministries hruaituten khawmpui hi an hmanpui bawk ang. He Khawmpui hian Thingsulthliah atanga Tinghmun thleng huamin kohhran 10 vel an ni. Khawmpui hmang hian Seling SDA te LTK Bus hmangin an kal a, hetah hian Tst SDA te pawh an tel nghal a ni. THINGSULTHLIAH V/C NEWS Hospital Area Vengsang Tuikhur tha taka siam zawh a ni a, Material hmangin P&E approach Road side-drain tha tak siam mek a ni bawk. Side-drain hi 120 mtrs vela thui a ni. SCHOOL LUT TAN DAWN School Calendar angin karleh ni 2 April 2013(thawhlehni) atangin Primary, Middle leh High School te Sikul an lut tan ang.