1

Yesu Hte Rau Sak Hkrung Let Yak HKak Kyin Dut Lam Hpe Awng Dang Tawt Lai Ga
Ga Hpaw: Karai Kasang gaw Yesu Hkristu hku nna kam sham ai ni hpe ru yak tsin yam lapran
kaw pyi lawt lu ai awng dang lam jaw nga ai Karai re. Hpa majaw nga yang, Yesu Shi nan
mungkan hpe awng dang ai wa re majaw, Yesu a hpung shingkang hte rai yang anhte kaning re ai
yak hkak kyin dut lam hpe rai tim awng dang tawt lai lu na ga ai.

Yubak a Shabrai: Dai ni mungkan hta shinggyim masha ni byin hkrum hkra ai ru yak jam jau ai
lam ni, yak hkak kyin dut ai lam ni yawng a n pawt gaw yubak rai nga ai. Dai npawt dai hpang hpe
hparan lu ai hpung shingkang sha n lu dingsa, mungkan ntsa hta ru yak tsin yam a mayam sha tai
nga na ga ai. Rai tim, Karai Kasang gaw, shinggyim masha ni mungkan ntsa hta dai zawn re ai
tsin- yam tsin dam hpe awng dang tawt lai lu let, Karai a shaman chyeju hta asak hte hpring tsup ai
asak hkrung lam, mungkan hpe awng dang ai asak hkrung lam lu la na matu, Yesu Hkristu hku nna
lajang da ya ai re.

Yesu Hta Sha Ngwi Pyaw Lam Lu La Na

Ndai mungkan hta ‘ngwi pyaw simsa lam hpe’ Karai Kasang gaw, Yesu Hkristu hku nna
jaw da ai re. Kaga hpa lam hku mung ngwi pyaw simsa lam hpe n lu la mai ai. Ja gumhpraw hku
mung, arawng aya hku mung, hpa ji degree hku mung, tinang a hkum hkrang n-gun atsam dat ai
hku nna mung n lu la mai ai. Karai Kasang hte sha ngwi pyaw simsa lam nga ai. Karai Yesu
Hkristu hku nna jaw ai chyeju kumhpa hpe hkam la lu ai ni sha mungkan hta ngwi pyaw simsa lam
lu la na ga ai re. Yesu Hkristu hta kam sham ai myit hte shingbyi ai ni sha hkam la lu na ga ai. Dai
majaw, Yesu mung “Nanhte Ngai hta ngwi pyaw ai lu la myit ga ngu nna, ndai ga ngai nanhte hpe
tsun ni ai: nanhte gaw mungkan ga e nni nkri hkrum sha myit dai: rai ti mung, dakring dakan rai
nga mu; ngai gaw mungkan ga hpe dang kau ni ai, ngu mu ai” (Yawhan 16:33) ngu tsun ai re.
Yesu tsun ai hta, ndai mungkan hta, Yesu Hkristu hpe hkye hkrang la ai madu hku hkap la
kam sham ai ni mung, n kam sham ai ni mung nni nkri hkrum sha na re. Ndai mungkan hta Karai
Kasang gaw Tsadan hpe ahkaw ahkang law law naw jaw da ai re. Dai majaw, mungkan hta nni
nkri naw nga nga ai re. Rai tim, Karai Kasang gaw, Yesu Hkristu hta dai nni nkri ni kaw nna lawt
lu ai, awng dang lu ai chyeju jaw da ai re. Yesu hpe kam sham ai ni yawng mungkan hpe awng
dang ai re. Mungkan hpe awng dang ai ngu ai gaw, hpa nni nkri mung n hkrum sana ngu ai n re.
Nni nkri kata hta awng dang ai asak hkrung lam hpe tsun ai re. Hpa ana ahkya mung n hkrum n
hkra sana ngu ai n re. Ana ahkya hkrum hkra nga ninglen pyi, dai ana ahkya gaw tinang hpe gyit
hkang da n lu ai sha lawng lu nga ai hpe tsun ai re. Ru yak shoi hpa n hkrum sana ngu ai n re. Ru
yak shoi hpa kata kaw Karai a hpung shingkang lu la nna tawt lai l una hpe tsun ai re.
Daniela laika daw kaba 3 hta Shadrach, Meshach, Abed-nego ni grung nga ai wan htung
hta n hkrat ai n re. Rai tim, Karai Kasang a chyeju hte shanhte a kara singgawng mi pyi n hkru ai
re. Daniela hkanghkyi nhkun hta jahkrat bang hkrum ai re. Rai tim Karai Kasang a lamu kasa ni
hpe shangun nna hkanghkyi ni a n-gup pat kau ya ai majaw, hkala nba n hkrum ai re (Daniela
6:22). Dai hpe nni nkri kata kaw nana lawt lu ai chyeju lu la ai, mungkan hpe awng dang ai ngu ai
re. Kaning re ai lam ni mi hkrum hkra ai rai tim, dai hpe awng dang kawt lai lu hpe mungkan hpe
awng dang ai ngu ai re. Dai rai nna, kaning re ai shara, mungdan, mabyin masa hta rai tim nni nkri
yak hkak lam ni gaw mang hkang n re. Tinang a asak hkrung lam hta Karai Kasang n nga jang,
Karai hte rau n rai jang, Karai a hpung shingkang n pu hta n rai jang mang hkang kaw lup mat, grut
mat, mat mat na re.
 2

Galile nawng hta sape ni hkrum hkra ai hkrit hpa tsin yam lahkawng nga ai. Langai gaw
Yesu n lawm ai majaw byin ai lam rai nna, langai mi gaw Yesu lawm ai aten byin ai lam re.
Yawhan 6:17-21 hta Yesu bum de lung mat wa ai kawn rai n yu wa shi yang, nsin sin wa sai
majaw, sape ni Yesu hpe tawn kau da nna nawng wora hkran na Kapena-um mare de rap sa wa ma
yang, laru hkrum ma ai. Kam hpa na Yesu n nga ai, Yesu shanhte hte rau n re ai. Yesu n lawm ai
shaloi laru hkrum chye ai re. Laru hkrum ai gaw mang hkang n rai tim, dai laru hpe shazim ya na
Yesu n nga ai gaw mang hkang kaba re. Myit mada shara n nga ai re. Rai tim Yesu gaw, sape ni
Shi hpe tawn kau da tim, shanhte ruyak tsinyam hkrum ai shaloi shanhte hpang de sa wa ai Karai
re. Sape ni Yesu hpe li hta hkap shalun la ai majaw, shanhte du na ra ai danam de, shaloi jang du
wa ma ai re. Yesu lawm jang my sha lam yan masa, sut masa, mung masa, shinggyim nga pra
masa ni yawng, jahkring mi na lapran, n kaja ai dukhka tsin-yam ni hkoi mat nna, mai kaja ai lam
ni hkrai byin pru wa na re. Karai Kasang galai shai ya dat jang jahkring mi na lapran hta galai shai
mat wa na re. Yosep hkawhkam wa a lawu hprut arawng aya lu ai lam mung jahkring mi na lapran
Karai kasang shabyin dat ai lam re. Yosep hpe 13 ning daram na ai sha loi she dai arawng aya
shabyin ya ai re. Kam sham ai ni a Tsinyam tsindam ni hkrum shangun ai gaw Karai Kasang a plan
nga ai.
Marku 4:35-37 hta hka wora hkrang de sape ni Yesu hte rau rap ai re. Yesu gaw li mai de
punghkum ntsa e yup pyaw nga ai. Shaloi laru hkrum nna, hkali hta hka kaput wa ai majaw li hta
hka hpring magang wa ai. Sape ni Yesu hpe sa jasu la ai shaloi she, Yesu laru hpe daru kau nna,
shanhte lawt lu, awng dang lu ma ai. Anhte a prat hta mung Yesu hpe shaga ra ai, hpyi nem ra ga
ai, kam hpa manoi manat ra ga ai.
Adam hte Ewah Edin sun hta hpa ra rawng ai lam n nga hkra hkum tsup ai re. Mungkan a
aja gumhpraw, sut gan sut rai myit chye myit chyang ni hte ra n rawng hkra hkum tsup nga ai
majaw n re. Karai Kasang dai kaw nga nga ai majaw, shan yan hte rau nga nga ai majaw, Karai a
hpung shingkang hte makawp maga da ai npu hta nga nga lu ai majaw re. Rai tim, Edin sun kawn
gau shapraw kau hkrum ai shaloi Karai rau n rai mat sai, Karai a hpung shingkang shan-yan hte rau
n rai mat ai shaloi shainggyim masha ni a asak hkrung lam hta ra rawng ai lam ni n pawt hpang wa
ai majaw matsan chyaren lam ni, nni nkri lam ni, tsin-yam tsindam lam ni hte si hkrung si htan lam
ni byin pru wa ai re. Dai majaw, shinggyim masha ni a asak hkrung lam gaw, Karai Kasang rau n
rai jang mang hkang kata nni nkri, myit mada shara n nga ai sha asak hkrung ra ai re.
Kaning re ai mungkan lam ni, nni nkri ni, tsinyam tsin dam ni mung tinang hpe gyit hkang
da n lu ai, shagrit da n lu ai, Kaman lila byin mat shangun ai, myit mada shara mat mat shangun ai,
si htum mat shangun ai lam n nga ai asak hkrung lam hpe Karai Kasang Yesu Hkristu hku nna
lajang da ya ai re. Mungkan mang hkang lam ni, nni nkri ni, tsinyam tsin dam ni, malu masha lam
ni, nga shingbyi na shara lam ni, ana zingli lam ni, hpyen majan lam ni hpe lai di nga ai aten hta
pyi kam sham ai ni gaw awng dang ai asak hkrung lam hta sak hkrung nga lu ai re. Rai tim, dai
gaw tinang a tsam marai, shinggyim masha ni a dang di lu ai atsam marai a majaw n rai, Yesu
Hkristu hpe kam sham ai hte Shi a hpung shingkang hta shingbyi nga ai majaw she re. Karai
Kasang kaw nna shaprat ai wa kadai rai ti mung, dai mungkan ga hpe dang kau nu ai: mungkan ga
hpe dang kau lu ai padang lam chyawm gaw, anhte a makam masham rai nga ai. Yesu gaw Karai
Kasang a kasha rai nga ai, nga nna kam sham ai wa sha n rai yang gaw, mungkan ga hpe dang kau
ai wa, kadai rai nga ata? (I Yaw 5:4-5) ngu nna tsun tawn da ai re. Mungkan hpe awng dang lu na
matu a ahkyak ai lam gaw, Yesu hpe kam sham ai lam re. Mungkan hpe awng dang lam a ahkyak
madung Karai Kasang rau rai nga ai lam re. Mungkan hpe awng dang ai Karai Kasang gaw anhte
shinggyim masha ni hte rau sa nga let (Emanuela), mungkan hpe awng dang lu ai chyeju jaw nga
ai re. Dinghta mungkan asak hkrung lam hta, shingra tara hku byin chye ai machyi makaw, hka li
 3

hka waw ni, mayak mang hkang ni, duhka tsin yam ni law law hkrum hkra na sha re. Hkum sai
shan a majaw byin ai, du hkra ladaw a majaw byin ai, majan n hpan a majaw byin ai duhka tsin-
yam ni law law shinggyim masha shagu hkrum sha chye ai re. Yesu hta sha tsin-yam kata, dukhka
kata, mayak manghkang kata hta nan lawt lu ai chyeju, awng dang lu ai chyeju lu la mai ai re.
Dai majaw, shani shagu tinang myit lu ai hku asak hkrung ai lam n re ai sha, Karai
Kasang hte rau sak hkrung hkawm sa na ahkyak ai re. Jahpawt yup rawt ai aten kawn Karai hte rau
rai ra ai. Karai hpe shingdu dat (sh) Karai hte rau n rai jang mungkan a shingra tara mang hkang ni
a gyit hkang da, dip ka up da, zingri da hkrum ai kaw myit htum myitchyum hte myit mada shara
mat mat na re.
Ja gumhpraw sutgan n lu ai gaw matsan chyaren ai lam n re. Yesu hpe n lu da ai lam she
teng sha matsan chyeren hkrum ai lam re. Tinang hte rau rai nga ai Yesu hpe kam hpa manoi
manat lam n nga ai lam she teng sha ru yak jam jau ai lam, matsan chyaren hkrum ai lam re.
Dinghta mungkan asak hkrung lam hta hpa ruyak jam jau lam, du hka tsin-yam n nga yang
n kaja ai i? Karai Kasang hpa rai dai dukkha tsin-yam ni hpe dinghta mungkan asak hkrung lam
hta hkrum hkra shangun a ta? ga san law law san chye ga ai re. Dinghta mungkan gaw, anhte
jahkring mi nga na matu sha re. Htani htana nga na matu n re. Dai majaw, Kolose 3:2 hta “Ga
ningtsa arai ni hpe myit hkum manoi myit, ningtsa na arai ni hpe myit manoi nga mu” ngu tsun da
ai re. Dai gaw, dinghta mungkan lam ni hpe myit maju n jung na matu Karai Kasang sharin ya nga
ai re. Anhte a hkum hkrang nan yubak hta gawng kya mat sai hkum sai shan re. N dai dinghta
hkum sai shan hte htanni htanna sum sing mung dan shang lu na n re. Kaning re ja sut gan arung
arai ni hte mi gayawp da ai mi rai tim, kaning re ai arawng aya, hpaji ni hte mawn sumli gayawp
da ai mi rai tim, ndai hkum sai shan gaw lani mi hten za na sha re. Dai n grin ai yubak hte seng ai
gawngkya ai hkum sai shan hte hkrung nga dingsa dukkha tsin-yam hkrum hkra na sha re. Ndai
dinghta hkum sai shan hte hkrung nga ai lam gaw, Asak kaba wa ai, n gun lagaw yawm wa ai,
dinggai dingla wa ai zawn re ai baw grit nem mat wa ai baw hkrai rai nna sihkrung si htan hkrum
na re. Dai majaw II Kor 6:16-18 hta “Dai rai nna anhte n hki n sang ga ai sha, anhte a shinggan na
wa hten bya hkrum rai ti mung, anhte a kata de na wa gaw, lani hte lani prat bai pra wa nga ai.
Kaning rai nme law, dan dawng nga ai arai ni gaw ndai aprat na sha, n dan n dawng nga ai arai ni
gaw htani htan arai rai nga ai majaw, dan dawng nga ai arai ni hpe anhte n tau yu ai sha, n dan n
dawng ai arai ni hpe tau yu let, ya e sha hkrum ai atsang sha rai nga ai tsin-yam tsindam gaw,
nachying kaba li la ai htani htanna hpung shingkang hpe anhte a matu mara a shachyen nga ai”
ngu nna htani htana lam hpe maju jung na matu sharin da ai re. Anhte a dinghta hkum sai shan gaw
galai mat nna she, htani htana sum sing mungdan de shang lu na ga ai re. Dai majaw, dai hpe
mahtang myit maju jung ra ga ai. Makam masham n kau mi gaw n dai dinghta mungkam hkum sai
shan hte hkrung nga dingsa gaw dukkha re, hpa akyu n nga ai ngu sharin ma ai re. Chyum laika hta
gaw, ndai dinghta mungkan hkum sai shan hte hkrung nga ai aten hkum hkra ai dukkha hkrum ai
aten hta nan pyi Yesu a shalawt la ai chyeju, awng dang lu ai chyeju jaw da ai lam sharin ai re.
Tengman ai Hkristan ni a matu gaw, dinghta mungkan hta hkrum hkra ai lam ma hkra gaw Karai
Kasang hpang de bai du wa na matu, grau grau kam sham na matu, grau kaba ai chyeju hkam la lu
na matu hkrai re. Ga shadawn, dam mat ai kasha (Luka 15:11-32). Hpilipi 1:21-23 hta kam sham ai
Hkristan asak hkrung nga ai gaw Hkristu nan rai nga ai, si wa yang mung amyat re ngu Kasa
Pawlu tsun da ai re.

Ga Hpungidm: Dinghta mungkan a hkrum hkra ai tsin-yam tsindam ni a lapran hta Karai
hte rau asak hkrung na hpe myit maju jung nga ga. Karai kasang rau rai nga ai hpe gabu myit dik
nga ga. Karai hte rau ruyak tsin-yam ni hpe lai di na hpe she myit maju jung let, yawng mayawng
 4

hpe awng dang tawt lai ga. Teng sha mungkan hpe awng dang ai asak hkrung lam Yesu jaw na re.
To God Be The Glory!

Ginlen shalai ai,

Lahphai Awng Li