PAEMUKA.

Mepae mu ka sɛ dwumadie yi firi m’ankasa m’ahoɔden, me nimdeɛ, ne nwoma ahodoɔ bi a

menyaa mu mmoa mu. Me nsa ano agyinahyɛdeɛ wɔ dwumadie yi so. Nwoma ahodoɔ a menyaa

mu mmoa no nso wɔ nwoma no akyi.

ƆTWERƐFOƆ NSA ANO AGYINAHYƐDEƐ ƐDA .

…………………………… …………………..…… ………………..

ƆHWƐFOƆ PAEMUKA

NSA ANO AGYINAHYƐDEƐ ƐDA

…………………………………. …………………………….
 DINTOƆ.

Meto saa nwoma yi de hyɛ me maame Margaret Agyeiwaa Mfum, ne me maame, Rebecca

Amoampong, ne me nua barima Rockson Mfum, ne me nuanom nkaeɛ nyinaa animuonyam.

ASEDA.

Mede aseda a ɛnni kabea ma Nyankopɔn sɛ wabɔ me ho ban, na wama me nyansa mmorosoɔ

ama m’atumi de atintim nwoma yi asomdwoeɛ mu. Aseda a ɛtɔ so bɛkɔ ama m’awofoɔ ne me

nuanom a wɔaboa abɔ me ho ka ama matumi asua adeɛ abɛsi saa mpɛmpɛnsoɔ yi. Mɛsane nso

ada akyerɛkyerɛfoɔ akukudam, a wɔwɔ suapɔn yi mu, ne titire, me hwɛsofoɔ, owura Mathias

Sackitey wɔ wɔn mmoa ne wɔn adaagyeɛ a wɔasɛe no wɔ me ho firi m’adesua yi ahyaseɛ abɛsi

nnɛ.

Mede aseda bio bɛma me maame Rebecca Amoampong wɔ ne sika a ɔde aboa me wɔ m'adwuma

yi yɔ mu. Onyankopɔn nhyira no pii.

ƐMU NSƐM.

PAEMUKA. i

DINTOƆ. ii

ASEDA. iii

ƐMU NSƐM. iv
ƆFA A ƐDI KAN

DWUMADIE NO NNIANIMU

1.0. Nnianimu.

1.1. Nhwehwɛmu No Nnyinasoɔ.

1.2. Ɔhaw No Adiyie

1.3. Nhwehwɛmu No Botaeɛ.

1.4. Nhwehwɛmu No Nsɛmmisa.

1.5. Ɔhaw a mehyiaa wɔ nhwehwɛmu no mu

1.6. Baabi a nhwehwɛmu no ano kɔpem

1.7. Nhwehwɛmu no ho mfasoɔ

1.8. Dwumadie no nhyehyɛeɛ

1.9. Ɔfa no Tɔfabɔ .

ƆFA A ƐTƆ SO MMIENU.

ANIMDEFOƆ BI ADWENKYERƐ.

2.0. Nnianimu.

2.1 Abakɔsɛm.

2.2 Akanfoɔ Nnwuma.

2.3 Abusua

2.3.1 Asakyiri .

2.3.2 Agona.

2.3.3 Asona

2.3.4 Aduana.

2.3.5 Ɔyokoɔ

2.3.6 Ɛkoɔna

2.3.7 Biretuo

2.3.8 Aseneɛ

2.4 Akyiwadeɛ

2.5 Deɛ Adikanfoɔ bi atwerɛ afa abosom ho

2.5.1 Berɛ ne beaeɛ a Akanfoɔ sɔre abosom

2.5.2 Abosom dwumadie

2.6 Ahensie

2.7 Tɔfabɔ.

ƆFA AƐTƆ SO MMIƐNSA.

NHWEHWƐMU AKWAN.

3.0. Nnianimu.

3.1. Beaeɛ A Meyɛɛ Me Nhwehwɛmu No.

3.2. Nnipakuo a Mede Wɔn Dii Dwuma no.

3.3. Ɔkwan a Mefaa so Paw nnipa no

3.4. Ɔkwan a Mefaa So Nyaa Nsɛm Yɛɛ nhwehwɛmu no

3.4.1. AKWANSRƐ

3.4.2. NKƆMMƆTWETWEƐ

3.4.3. NSƐMMISA

3.4.4. NSRAHWƐ

3.5. Ɔfa no mmuabɔ.

ƆFA A ƐTƆ SO NNAN.

DWUMADIE NO ANKASA.

4.0. Nnianimu

4.1. Kofiase abɔseɛ

4.1.1 Kofiase abakɔsɛm

4.2 Adekye saeɛ a ayɛ ɔbosom kɛseɛ no ho abakɔsɛm

4.3 Mmusuakuo ahodoɔ a ɛwɔ kuro no mu ne nkonwa a wɔdi

4.3.1 Aseneɛ abusua

4.3.2 Aduana abusua

4.3.3 Ayokoɔ abusua

4.3.4 Agona abusua

4.3.5 Asona abusua

4.3.6 Biretuo abusua

4.4 Nnwuma ahodoɔ no mu bi a wɔyɛ wɔ Kofiase

4.4.1 Kuayɔ

4.4.2 ahayɔ

4.4.3 Tireyɛ

4.4.4 Adepam

4.4.5 Dwadie

ƆFA AƐTƆ SO NNUM.

TƆFABƆ, NSUSUIƐ NE AWIEEƐ

5.0. Nnianimu

5.1. Tɔfabɔ.

5.2. Nsusuiɛ.

5.3. Dwumadie no Ho Mfasoɔ

5.4. Awieeɛ.

NWOMA A MENYAA MU MMOA.

ƆFA A ƐDI KAN

DWUMADIE NO NNIANIMU

1.0. NNIANIMU

Ɔfa a ɛdikan yi kasa fa me nhwehwɛmu no nyinasoͻ, ͻhaw adiyie, nhwehwɛmu no botaeɛ, nhwehwɛmu

no ho nsɛmmisa, ͻhaw a mehyiaeɛ wͻ nhwehwɛmu no mu, baabi a nhwehwɛmu no ano kͻpem,

nhwehwɛmu no ho mfasoͻ, dwumadie yi nhyehyɛeɛ ne ͻfa yi tͻfabͻ.

1.1. Nhwehwɛmu No Nnyinasoɔ.

Kuro biara wͻ n’abakͻsɛm, ɛnam so ma yɛhunu ͻman no amammerɛ ne amanneɛ, ɛsiane nso ma yɛhunu

nkuro a ahinta. Antwi (2001:55) ka sɛ, “Abakɔsɛm yɛ nsɛm ne nneɛma bi a ɛfa nkurɔfoɔ binom ho, nkuro

bi ho ne wɔn amammerɛ, amanneɛ ne wɔn asetena mu nsɛm ho”.

Sɛdeɛ wɔn amammerɛ da nso wɔ wɔn ho wɔn ho ntam no, saa ara nso na wɔn mu biara abakɔsɛm da nso

na ɛsom bo ma wɔn yie. Agyeman (2002:123) kyerɛ sɛ, “abakɔsɛm yɛ nsɛm bi a asisi pɔtee a ɛfa

nkuro bi ho a mpanimfoɔ ka kyerɛ nkyirimma ne awoɔ ntoatoasoɔ“.

Yɛbu nkɔmpɔ kɔhwɛ saa abakɔsɛm yi nyinaa a, akɔyɛ ano kasadwini a wɔnam wɔn anom nsɛm so na ɛde

to dwa, na mmom yɛntintimm nguu nkrataa so. Ofori (2008) nso da no adi sɛ, "abakɔsɛm yɛ nsɛm

bi a asisi pɔtee a ɛfa nkuro bi ho a mpanimfoɔ ka kyerɛ nkyirimma ne awoɔ ntoatoasoɔ".

Ɛnnɛ yi, yɛn ara yɛtumi hunu nsonsonoeɛ kɛseɛ a abɛda sɛdeɛ na yɛn nananom yɛ wɔn ano kasadwini, ne

sɛdeɛ yɛn pɛn yi so yɛyɛ no. Yei ama nimdeɛ afoforɔ afra yɛn abakɔsɛm ahodoɔ no mu. Ne saa nti, ɛreyɛ

ayera. Nnipa pii wɔ yɛn man yi mu a wɔntee Kofiase din na kampɛsɛ wɔate wɔn abakɔsɛm. Wɔn a wɔate

edin no, ne kuro mma no binom wɔ hɔ a wɔnnim abakɔsɛm no ho hwee. Yei nti mehunuu hia a ɛho bɛhia

sɛ mɛtintim abakɔsɛm yi wɔ nkrataa so, na daakye bi, ne nnɛ yi mpo, yɛahunu akyiri kwan, na anyera,

ɛsiane sɛ mpanin se “Dabi asɛm nti na yɛdɔ kɔto kwadu a yɛgyam ho” Mepɛ sɛ mehyɛ mu kena ma no

tim wɔ atwerɛ kwan so.

1.2 Ɔhaw no adiyie

Nnipa pii wɔ yɛn man yi mu a wɔntee kuro Kofiase din na kampɛsɛ wɔate wɔn abakɔsɛm. Wɔn a wɔate

edin no, ne kuro mma no binom wɔ hɔ a wɔnnim abakɔsɛm no ho hwee. Ɛnam sɛ adikanfoɔ no antumi

atintim yɛn abakɔsɛm yi angu nwoma mu nti, ɛreyɛ ayera. Metuu anammɔn kɔɔ Kofiase kuro no mu

kɔbisaa kuro mma no bi Kofiase abakɔsɛm. Mesane nso kɔɔ kuro mpanimfoɔ bi nkyɛn kɔbisaa wɔn

Kofiase kuro no abakɔsɛm. Mehunuu sɛ kuro mma no a mebisaa wɔn nsɛm dodoɔ no ara nnim wɔn kuro

no abakɔsɛm. Afei, ɛnam sɛ mpanimfoɔ a wɔnim abakɔsɛm no mu fa kɛseɛ no ara kɔ wɔn kra akyi nti,

ama abakɔsɛm no nwie pɛyɛ. Yei maa mehunuu mfasoɔ a ɛbɛba so sɛ mɛyɛ saa nhwehwɛmu yi afa

Kofiase ho akɔ akyiri, na matintim no wɔ nwoma mu, anaa krataa so.

1.3 Nhwehwɛmu no botaeɛ

Adesuadeɛ yi botaeɛ ne sε;

(I) ɛbɛkyerɛ Kofiase abɔseɛ ne n'abakɔsɛm

ii) ɛbɛkyerɛ adeɛ kye saeɛ(adekye saeɛ) no a ayɛ ɔbosom kɛseɛ wɔ kuro no mu no abakɔsɛm

iii) ɛbɛkyerɛ Akanfoɔ mmusuakuo no mu dodoɔ a ɛwɔ kuro no mu ne nkonwa a wɔdi

iv) ɛbɛkyerɛ nwuma titire a ɛwɔ Kofiase

1.4 Nhwehwɛmu no nsɛmmisa

i) Kofiase abɔseɛ ne n'abakɔsɛm ne sɛn?

ii) Adekye saeɛ no ho abakɔsɛm ne sɛn?

iii) Mmusuakuo dodoɔ sɛn na ɛwɔ Kofiase, nkonwa bɛn na wɔdi?

iv) Nwuma titire bɛn na ɛwɔ Kofiase kuro no mu?

1.5 Ɔhaw a mehyiaa wᴐ nhwehwɛmu yi mu

Sɛ meka sɛ manhyia ɔhaw wɔ me dwumadie yi mu a na meretwa atorɔ. Kofiaseman ntintimm kuro no

abakɔsɛm nguu nwoma mu ntoo hɔ enti sɛ wobɛte Kuro no abakɔsɛm a gye sɛ anosɛm. Da a ɛdi kan a

mekɔɔ kuro no mu no, na kuro no mu mpaninfoɔ ahyiam wo ahemfie nanso na wɔkyerɛ sɛ ɔman no mu

hene nka wɔn ho. Berɛ a mede M'ahiasɛm too wɔn anim no, ɛsiane sɛ wɔn abakɔsɛm no akɔyɛ anosɛm

no nti na mpaninfoɔ no nhunu deɛ ɔde ne ho bɛsi hɔ asɛe n'adaagyeɛ akyerɛkyerɛ me kuro no abakɔsɛm.

Na wɔkyerɛ sɛ wɔn nwuma dɔɔso. Yei yɛɛ ɔhaw a ɛsii m'anim pɛɛ a anka ɛrebu m'abam, ɛfiri sɛ na ɛyɛ da
a ɛdi kan a mekɔɔ kuro no mu. Akyeamehene ne Benkumhene maa me nyaa no nteeɛ sɛ wɔbɛboa me.

Me nhwehwɛmu no mu ara na Otuo Agyei Acheampong a ɔno ne Kofiaseman hene firii mu. Yei twee me

nhwehwɛmu no sensɛneeɛ. Afei na akɔba sɛ megye Akyeamehene ne Benkumhene nɔma na yɛhyɛ me

dwumadie no ase wɔ foono so. Foono so nkɔmmɔ yi maa me bɔɔ ka yie. Foono so nkɔmmɔ no akyi na

ɛwɔ sɛ mesane foro kaa kɔ kuro no so abrano abrano kɔhwehwɛ nnoɔma a atwa kuro no mu ahyia sɛdeɛ

ɛbɛyɛ a metumi anya nsɛm de adi me dwuma no na mpanin se, "Kwakye adeɛ yɛ fɛ a yɛde sika na ɛyɛ"

akɔneabadie yi nso maa me sɛee sika pii nanso m'abam ammu. Ɛtɔ da a mefrɛ wɔn a na wɔretutu me

hyɛ da. Nanso metɔ kɔɔso yɛɛ nhwehwɛmu yi sɛdeɛ ɛsɛ na ɛfata.

1.6 Baabi a nhwehwɛmu no ano kͻ kͻpem

Medii dwuma no nyinaa wɔ Kofiase kuro no mu. Na anka ɛwɔ sɛ metu anamɔn kɔ Agona ahemfie kɔbisa

Ɔpɔn Panin ne Ɔpɔn Kumaa a ɛnam wɔn so ma yɛnyaa kuro Kofiase no ho asɛm, na afei nso metu

anamɔn kɔ Tano asefoɔ a wɔfiri Takyiman tu bɛtenaa Kofiase maa wɔboa kyekyeree kuro no nkyɛn kɔbisa

wɔn deɛ ɛsiiɛ a wɔtu baa Kofiase. Nanso mpaninfoɔ se, " Mɛkɔ bi mɛkɔ bi ɛno ne sika yi ara" sikasɛm nti

mantumi anyɛ yeinom. Nanso me dwumadie yi kasa fa Kofiase abakɔsɛm, adekye saeɛ no ho abakɔsɛm

ne nwuma ahodoɔ a ɛwɔ kuro no mu.

1.7 Nhwehwɛmu yi ho mfasoͻ

Me dwumadie yi ho mfasoɔ ne sɛ; Ɛbɛyɛ mmoa nwoma ama wɔn a daakye bi wɔbɛyɛ

nhwehwɛmu afa nkuro abakɔsɛm ho. Ɛbɛsane aboa ama mpanimfoɔ ne ahemfo binom ahunu hia

a ɛhia sɛ wɔkurukyire wɔn nkuro ho abakɔsɛm gu nwoma mu na aboa ama nkyirimma ahunu nea

wɔfiri ne nea wɔrekorɔ. Saa nhwehwɛmu yi bɛboa nkyirimma ama wɔahunu wɔn abakɔsɛm ne, hia a

ɛho hia sɛ wɔbɔ ho ban. Ɛbɛsane aboa ama wɔn a wɔntee Kofiase nka no ate, na wɔate ho nsɛm bi a ɛhia.

Afei, ɛnam sɛ wɔnhyɛɛ da ntintimm nkrataa biara mfaa kuro yi ho nti, saa dwumadie yi bɛyɛ krataa a

yɛatintim kuro yi ho nsɛm wɔ mu, na aboa ama kuro yi din aduru akyire yɛn man yi mu.
1.8 Dwumadie yi nhyehyɛeɛ

Dwumadie yi gu afa ahodoͻ num. Ɔfa a ɛdi kan no kura nnianimu, nyinasoͻ, ͻhaw adiyie, nhwehwɛmu

no botaeɛ, nhwehwɛmu no nsɛmmisa, ͻhaw a mehyiaa wͻ nhwehwɛmu no mu, nhwehwɛmu no ho

mfasoͻ, dwumadie yi nhyehyɛeɛ ne ͻfa no tͻfabͻ.

Ɔfa a ɛtͻ so mmienu kasa fa animdefoͻ bi nhwehwɛmu bi a wͻayɛ afa kuro bi abakͻsɛm, abosom ho,

mmusuakuo ne nsɛm bi asekyerɛ.

Ɔfa a ɛtͻ so mmiɛnsa kasa fa nhwehwɛmu no, ͻkwan a mefaa so nyaa nipa de dii dwuma yi, nnipa dodoͻ

a me ne wͻn dii dwuma yi ne ͻkwan a mefaa so nyaa nsɛm yɛɛ nhwehwɛmu no.

Ɔfa nnan no de yɛn bɛdɔ asukɔ wɔ Kofiase abakɔsɛm no ne n’abɔseɛ mu, adekye saeɛ a ɛwɔ kuro no mu

ho abakɔsɛm, mmusuakuo ahodoɔ ne nkonwa wɔdi no kuro no mu ne nwuma atitire a wɔyɛ no kuro no

mu.

Afei, ͻfa a ɛtͻ so num no nso bɛbͻ dwumadie no nyinaa tͻfa na asane ada nsusuiɛ a mewɔ fa Kofiase

abakͻsɛm ho.

1.9 Ɔfa yi Tɔfabɔ.

Ɔfa yi hyɛaseɛ firi nyinasoɔ, ɔhaw no adiyie, botaeɛ, nsɛmmisa, ɔhaw a mehyiaa no wɔ nhwehwɛmu no

mu, baabi a nhwehwɛmu no ano kɔpem, nhwehwɛmu no mfasoɔ ne dwumadie no nhyehyɛeɛ.

 ƆFA A ƐTƆ SO MMIENU.

ANIMDEFOƆ BI ADWENKYERƐ.

2.0. Nnianimu

Ɔfa yi mu no yɛbɛhunu deɛ animdefoɔ bi aka afa nsɛm bi te sɛ; kuro abakɔsɛm asekyerɛ

ho, nnoɔma a ɛdi akotene wɔ abakɔsɛm mu, nnwuma bi a nnipa yɛ, Akanfoɔ mmusuakuo,

akyiwadeɛ, ne abosom ne wɔn dwumadie ho. Mempɛ sɛ me dwumadie yi nteaseɛ bɛyɛ

biribi a ɛwɔ hɔ nti, mentumi nsɔre prɛko pɛ nka abakɔsɛm no watraa saa ara a menkyerɛ

nsɛm bi mu. Saa nti, na ɛwɔ sɛ metumi boa ma yɛhunu saa nnoɔma yi, na ama me

nhwehwɛmu dwumadie yi nteaseɛ no mu ada hɔ pefee.

2.1 Abakɔsɛm

Antwi (2001:55) ka sɛ, “Abakɔsɛm yɛ nsɛm ne nneɛma bi a ɛfa nkurɔfoɔ binom ho, nkuro

bi ho ne wɔn amammerɛ, amanneɛ ne wɔn asetena mu nsɛm ho”.

Abakɔsɛm yɛ nsɛm bi a asisi na ɛho wɔ adanseɛ, ɛyɛ nsɛm a ɛyɛ nokorɛ turoduroo. Sɛ

ebia: Aborɔfo a wɔbaa sika mpoano (Boasiako, n.d:69)

Agyeman (2002:123) nso da no adi sɛ, “Atetesɛm anaa abakɔsɛm yɛ nsɛm bi a asisi pɔtee

a ɛfa nkuro bi ho a mpanimfoɔ ka kyerɛ nkyirimma ne awoɔ ntoatoasoɔ“.

Abakɔsɛm a ɛfa kuro bi ho tumi yɛ akosɛm, atoyerɛnkyɛm bi a ɛtoo kuro no (yaredɔm,

awuwuawuwuo ne ade), (Abaido, 2007:34).

Abakɔsɛm yɛ daa daa asetena mu nsɛm bi a asi atwam, na ɛwɔ adansefoɔ. Ɛyɛ nsɛm bi a

ɛfa ankorɛankorɛ anaa ɔman bi a ɛmu nnipa binom anya wɔn baabi kɔ ho, na yɛde ma

nkyirimma sɛ abrabɔ mu susudua, (Boahene, 2001).

Asante (2001) kyerɛ sɛ "abakɔsɛm yɛ adeɛ bi a ɛkyerɛ ɔman bi abɔseɛ daadaa ne kasa a

ɛkyerɛ sɛnea nneɛma anaa nsɛm bi sisii wɔ ɔman bi so ne ɔkwan a wɔfaa so kyekyeree

kuro no.

Kofi Asante (2017) kyerɛ sɛ, "abakɔsɛm yɛ abasɛm a ɛfa nnipakuo anaa kuro bi mfitiaseɛ,

ɛmu nnipa suban, wɔn gyedie ne wɔn akosɛm ho.

Filipino (2022) kyerɛ sɛ, "abakɔsɛm yɛ nneɛma anaa nsɛm a asisi atwam wɔ nnipakuo

binom asetenam anaa wɔn abrabɔm ne nkuro binom ho a abɛyɛ nsɛnnahɔ ama nkyirimma

ne awoɔ ntaotaosoɔ nyinaa.

Koranten, E.O (1961) nso kyerɛ sɛ, "abakɔsɛm yɛ nsɛm bi a ɛfa nnipakuo binom ho

atukɔtena ho nsɛm ne ɔkwan a wɔfaa so de bɛpue baabi a wɔwɔ saa berɛ yi mu de yɛ

nhwɛso deɛ ama nkyirimma ne awoɔ ntoatoasoɔ nyinaa. Koranten, E.O.(1961) dii dwuma

a ɛfa Akanfoɔ aman bi atukɔtena ho. Wɔ ne nwoma a wato din sɛ "Ɔsabarima" mu no

kyerɛɛ ɔkwan a Akanfoɔ aman bi te sɛ Akuapem, Abuakwa, Akyem, Akwamu ne aman

ahodoɔ pii faa so a wɔbɛpuepuee deɛ wɔwɔ saa berɛ yi mu.

Deɛ Koranten E.O.(1961) twerɛɛ wɔ ne nwoma no mu da no adi pefee ma yɛhunu sɛ,

aman pii wɔ hɔ a wɔdii atutena ara de bɛsi nnɛ a ɛno bi ara na Bodi ne Aowinfoɔ yɛeɛ no.
Gabianu L. A(2004:6) atwerɛ wɔ ne nwoma a wato din sɛ "IF YOU KNOW YOUR

HISTORY" mu sɛ Etsiifoɔ ne Akanfoɔ a wɔdii kan bɛsoɛɛ Ghana mpoano anaafoɔ fa mu

a wɔn kuropɔn ne Adowegyir. Na merɛ bi akyi no Etsifoɔ yi bɛhunuu amane wɔ

Mfantefoɔ nsa ano a wɔbɔɔ wɔn peteeɛ maa wɔn mu fa kɛseɛ no ara bɛdanee Mfantefoɔ.

Ɔtoaa so bio wɔ ne krataa no mu sɛ, berɛ a Mfantefoɔ no bɔɔ wɔn hweteeɛ saa berɛ no,

Mfantefoɔ no bɛtenaa Adowegyir hɔ de hɔ yɛɛ wɔn kuropɔn. Ɛhɔ na ɛnnɛ yi wɔfrɛ hɔ

Mankessim no. Wɔn na wɔde Estiifo no maa wɔn no ɛfiri sɛ na wɔn tiri afu kuhaa.

Ofori (2008) kyerɛ sɛ abakɔsɛm yɛ nsɛm bi a asisi pɔtee a ɛfa nkuro bi ho a mpanimfoɔ

ka kyerɛ nkyirimma ne awoɔ ntoatoasoɔ.

2.2. Akanfoɔ nnwuma ahodoɔ

Agyeman (2008:110-112) Akanfoɔ wɔ nnwuma bebree a wɔyɛ no wɔn asetena mu. Sɛ

yɛhwɛ Akanfoɔ asetena mu a, saa nnwuma no mu fa kɛseɛ no ara yɛ nsaanodwuma.

Yɛtae hunu sɛ mmarima na wɔtae yɛ nsaanodwuma yi. Nnipakuo a wɔyɛ saa nnwuma bi

ne kɛntɛnwonofoɔ, atomfoɔ ne akuafoɔ.

Ne saa nti, ɔman biara wɔ nnwuma ahodoɔ a emu nnipa dodoɔ no ara nam so tena ase ma

ɔman no gyina ne nan so pintinn. Nnwuma no bi yɛ daadaa asetena mu deɛ, ɛnna ebinom

nso yɛ nea wɔyɛ no berɛ a wɔwɔ adaagye. Akanfoɔ nnwuma no bi ne: ha, kua, abɛtwa,

kɛntɛnwɔno, kentenwono, sɔya twee, atonoo, mmoayɛn ne nea ɛkeka ho. (Arthur, 2003:

166).

2.3 Abusua
Asomah bisaa wɔ ne nwoma no mu sɛ, “Hwan ne Ɔkanni?” Ɔno ara buaa sɛ, “Ɔkanni ne

obi a ɔbɔ abusua ne ntɔn, na ɔdi ade kɔ ne na, anaa ne maame abusua mu”. Yei kyerɛ sɛ,

abusua anaa abusubɔ yɛ Ɔkanni biara ho adeɛ. Abusua gyina hɔ ma nnipakuo bi a wɔfiri

mogya baako mu, na wɔto wɔn nkyi kɔsi ɛna baako so. Asomah, (2017).

Arhtur (2008) kyerɛ mu sɛ ɔkanni biara bɔ abusua, na saa ɔkanni no ne obi a ɔbɔ abusua

kɔ maame fa mu. Akanfoɔ wɔ gyedie bi sɛ, mogya a ɛwɔ ɛna fam ne ntorɔ a ɛno nso wɔ

agya fam hyia na ɛma ɔkra teasefoɔ. Saa mogya no na yɛfrɛ no abusua. Deɛ ɛfiri mogya

“Ɛna fam” no na yɛfrɛ no “bogya abusua” “Cognatic kinship”. Deɛ ɛfiri awareɛ mu no

nso, wɔfrɛ no awareɛ abusuabɔ.

Abakɔsɛm kyerɛ sɛ, tete no, na nnipa tete ankorɛankorɛ a na wɔnenam pɛ nnuaba ansa na

wɔadidi. Sɛ wɔnenam na adeɛ sa a, na wɔapɛ dua bi aforo akɔda so anaasɛ wɔapɛ adukuro

bi akɔda mu ama adeɛ akye. Wei akyi na onipa bi a wɔfrɛ no Abu baeɛ. Deɛ Abu yɛeɛ ne

sɛ, ɔboaboaa ne nnuanom, wɔn mma ne wɔn mma-mma ano a ɔne wɔn tenaa faako bɔɔ

bra.

Abu wuo akyi no, nnipa fitii aseɛ boaboaa wɔn asefoɔ ano tenaa beaeɛ korɔ. Sɛ obi yɛ

sɛdeɛ Abu yɛeɛ no bi a, deɛ na wɔka ne sɛ, ɔresua Abu anaasɛ Abu asuafoɔ. Akyire yi,

ɛbɛdane “Abusua” a ɛkyerɛ sɛ “Abu asuafoɔ“.

Abusua yɛ ɛna mogya a ɔkanni ba biara bɔ. abɔfra biara nya n’agyapdeɛ ne ne diberɛ firi

ɔmaame hɔ (Boasiako, n.d: 80-83). Akanfoɔ mmusua no yɛ nwɔtwe, weinom na ɛdidi soɔ

yi:
2.3.1 Asakyiri

Arthur (2003) se, wɔyɛ abusua a ɛyɛ abusua nyinaa Piesie, ne abusua nkaeɛ no nyinaa

nanso nnipa nnɔɔso. Wɔn akra aboa ne Pɛtɛ ne Ɔkɔdeɛ. Ne nua baa ne Pɔne. Aburi titire

na wote saa din yi. Ne Piesie ne Asare a ɔfiri Adanse Akorokɛre. Wɔn nnyesoɔ ne

Ofoona.

2.3.2 Agona

Arthur (2003) se, Agonafoɔ abusua yɛ abusua ɛtɔ so baanu. Agona Piesie ne Ampɔnsɛm a

ɔfiri Denkyira. Agona wɔ Manu ne Mɛnsa. Manu na ɔwaree Adu akonnwa a ɛwɔ Akyem

Oda. Mɛnsa nso ne Bɔdwesango Ɔbaahemma Adu Gyamfi. Wɔn akraboa ne Ako. Wɔn

mmrane ne “Ako nana”. Wɔn nnyesoɔ ne ago-na. Agonafoɔ wɔ nyansa ne nimdeɛ pa ara.

2.3.3 Asona

Arthur (2003) se, wɔn mu nnipa dɔɔso sene abusua biara. Wɔn piesie ne kuntunkununku

a ɔfiri Asanse Sebenso wɔn akraboa ne anene ne asona-wɔ. wɔn nnyesoɔ ne Oforina.

Asonafoɔ wɔ akokoɔduro pa ara. Wɔn mmrane ne sɛ: Wɔmpere kwa, wɔpere hwehwɛ

adeɛ anaa Asonafɔ a wɔn atikɔ te sɛ obi anim.

2.3.4 Aduana

Arthur (2003) se, Aduanafoɔ yɛ Akanfoɔ mmusuakuo baako a wɔdii kan sɔɔ gyentia ano

kane, ɛno nti ɛnam wɔn so ɛmaa yɛnyaa gya. Wɔn gyentia a ɛdi kan na ɛtua ɔkraman ano.

Aduanafoɔ Piesie Bɔmaa Kusi a ɔfiri Domaa Ahenkuro de bɛsi nnɛ, Piesie, Manu ne

Asumagya. Wɔbɔ wɔn mmrane sɛ “Ɔdensene” asekyerɛ ne wɔyɛ adefoɔ wɔn nso nni

baabiara, wɔn akraboa ne ɔkraman. wɔn nnyesoɔ ne siaw na.

2.3.5 Ɔyokoɔ

Arthur (2003) se, Asantehene ne wɔn piesie. Wɔn akraboa ne akɔrɔma a wɔn mmrane nso

ne: ɔyokoɔ, yɛfa adeɛ a yɛde kyerɛ, yɛfa no bum. Wɔn nnyesoɔ ne Obiri na anaa Oburu.

2.3.6 Ɛkoɔna

Arthur (2003) se, Ɛkoɔ Asimpi Asare na ɛyɛ wɔn akraboa. Edin no asekyerɛ ne sɛ: “Asare

a ne mu yɛ duru te sɛ simpie”. Oguaahene ne wɔn piesie. Doku-na anaa Adua-na ne wɔ

nnyesoɔ.

2.3.7 Biretuo

Arthur (2003) se, Etwie a wɔfrɛ no ɔsebɔ, ɔkyɛm, ɔkrobɔn anaa aboa fufuo ne wɔn

akraboa. Ofori Kwadwo a ɔfiri Ayaase ne wɔn piepie. Wɔn nnyesoɔ ne Otwi na anaa

Asabe. Biretuofoɔ yɛ akofo pa ara, wɔn na wɔhyɛɛ dadeɛ kyɛ dii ako kane. Wɔn mmrane

ne: Etwie nana a yɛde akoraboɔ gyegye no taataa.

2.3.8 Aseneɛ

Agyeman (2008) se, ampan ne ansee ne wɔn akraboa. Kumase amakomhene ne wɔn

piesie. Wɔn nnyesoɔ ne Adɔnten.

Yɛhunu saa mmusuakuo yi nyinaa mu nnipa binom wɔ nkuro ahodoɔ a yɛde redi dwuma

wɔ yɛn nhwehwɛmu yi mu.

2.4 Akyiwadeɛ
Akyiwadeɛ yɛ suban, nneɛma anaa nneyɛeɛ binom a kuro ana ɔman bi abara na ɛnsɛ sɛ

emu nnipa da no adi anaa wɔyɛ. Akyiwadeɛ yɛ nneɛma binom a mpanimfoɔ susu sɛ ɛho

te, ɛyɛ hu, ɛsom bo, tumi wɔ mu, sɛbe, ebi yɛ tan na yɛnnka. (Agyekum, 2010:4-6)

Akanfoɔ akyiwadeɛ bi ne sɛ: ɔbarima bɛfa ɔbaa wɔ wuram, sɛ obi bɛdi mogyafra ne ade.

Sɛ obi bu akyiwadeɛ so a, wɔtumi twa no asu, wɔbɔ no ka sane tumi ma no twitwa nkokɔ

ne nnwan.

2.5 Deε adikanfoͻ atwerɛ afa abosom ho

Saa ᴐfa yi kyerε nhwehwεmu bi a animdefoᴐ bi ayε afa abosom ho, wᴐn din, beaeε a

wᴐte na wᴐdi wᴐn dwuma, wcn tumi ne wᴐn so mfasoᴐ.

Nkansah (1991) kyerɛ sɛ, kane no, sɛ Nananom tu a, wͻde wͻn abosom nyinaa na ɛkͻ.

Wͻde wͻn werɛ nyinaa hyɛɛ wͻn abosom mu, na wͻde wͻn sii Onyankopͻn anan mu.

Wͻfaa wͻn sɛ wͻn nyame wͻ wͻn dwumadie biara mu. Eyi nti, sɛ ͻman bi tu kͻkyekyere

kuro foforͻ a, wͻma abosom yi di wͻn tiban na amma bͻne ammɛtena wͻn mu. Na wͻn

abosom no akͻyɛ kokurobetie a obiara nkwanti wͻn mmͻ pͻ.

Ɔsɛe Kwadwo (2002) Kyerɛ sɛ, Akanfoͻ gye onyankopͻn di nti sɛ mpɛn pii no, sɛ obi

wu mpo a, wͻtumi ka sɛ w′ayɛ onyame dea. Bio sɛ abosom yi na wͻgye nipa aforebͻ ne

wͻn abisadeɛ kͻ onyankopͻn hͻ. Afei wͻgye mmuaeɛ firi onyakopͻn hͻ brɛ nipa.

Boahen (2001) kyerɛ sɛ, abakͻsɛm yɛ daa daa asetena bi a ɛsii wͻ ͻman bi mu a saa nsɛm

no wͻ adansefoͻ. Ɛyɛ nsɛm bi ɛfa ankorankorɛ bi a wͻanya wͻn baabi kͻ ho wͻ ͻman bi

mu a saa nsɛm no wͻ adansefoͻ. Ɛyɛ nsɛm bi ɛfa ankorankorɛ bi a wͻanya wͻn baabi kͻ
ho a yɛde ma nkyirimma sɛ abrabͻ ho susudua. Nea ͻkyerɛfoͻ yi aka no, ɛkyerɛ sɛ jfa

nsɛm bi a asi a ɛfa kuro bi ho, nnipa ho, ɛnsɛ sɛ ɛtͻ nsuo mu koraa.

Kofi Agyekum (2011) Akanfoɔ gyidie ne sɛ, Otweaduampɔn de tumi soronko bi ama

abosom, na saa tumi yi na ɛma abosom yɛ sunsum mu anwanwadeɛ.

Peter A, (1977) Kyerɛ sɛ, mpɛn pii no abosom no hwehwɛ sɛ yɛde nkokͻ bɛdane wͻn

akyi wͻ wͻn mmoa a wͻde boa me.

Boahene, A. (2003) Kasa fa abosom no mu baako ho, na ͻkyerɛ sɛ, Anyaman yɛ bosom

na mmom ͻnni ͻkͻmfoͻ a wͻkͻm ma no, na ͻwͻ mpaninfoͻ wͻtete ho a wͻ boa yɛ

amanneɛ ma no. Ɔkyerɛɛ sɛ, ɛnyɛ abosom nyinaa na ɛwͻ akͻmfoͻ a wͻkͻm wͻn ano.

Yɛtumi hunu sɛ deɛ nhwehwɛmufoͻ ne atitire binom akeka yi nyinaa di adanseɛ sɛ,

abosom yɛ ntamgyinafoͻ ma nipa ne Onyankopͻn. Abosom dwumadie ne sɛ wͻboa nipa

yɛ wͻn ahiadeɛ ma wͻn mmom ɛnyɛ sɛ wͻkumkum nipa sɛdeɛ binom anya nkaeɛ no.

Peter, A. (1977) kyerɛ sɛ, abosom tumi kyerɛ onipa hyɛbrɛ. Ɔtoaa so sɛ, abosom yɛ

ahonhom bi a yɛmfa y'ani nhunu. Ɔtoaa so sɛ, abosom gu ahodoͻ mmienu. Deɛ edi kan

ne Yaawa anaa Asuo mu bosom ɛna deɛ ɛtͻ so mmienu ne abosom Mmarafoͻ.

2.5.1 Berɛ ne beaeɛ a Akanfoͻ sɔre abosom

Agyekum (2011) kyerɛ sɛ, dabɔne da biara, adidie ne nsahyɛ aseɛ no, wɔfrɛ abosom.

Akanfoɔ tumi sɔre wɔn abosom wɔ ahemfie ne abosomfie. Ɔtoaa so sɛ, abosom tumi di

dwuma pii. wctumi bɔ nnipa ho ban firi sunsummɔne te sɛ bayie ne nnutufoɔ.

Abosom tenabea

Agyekum (2011) kyerɛ sɛ, abosom tumi tena bepɔ mu, te sɛ, Baba Bepɔ,Cboc tabiri,

nsuom abosom nso bi ne Tanɔ, Birem, Ayanta a ɛwɔ Asante Bekwae, Afram ne Antoa

Nyama. Nnua ne nhoma mu abosom no bi ne Homakyɛm, Odum, Odii ne Tweneduro.

Peter (1977) kyerɛ sɛ, ɛyɛ ahonhom bi a wͻtete abͻdeɛ mu sɛ ɛbia, nsuo, abotan, nnua,

nnipa ne mmoa mu. Ɔtoaa so sɛ, wͻn nyinaa ɛwͻ akwan a wͻfa so da wͻn tumi adi.

Korsah La & Kuwornu (2019) kyerε sε, ᴐbosom Nana Fosu yε bosom bi ᴐte Cape Coast

nsoum a yεfrε no Lagun, Nana Tabiri so yε bosom a wᴐte abotan a εwᴐ CapeCoast

mfinimfini mantam mu, bosom a yεfrε no Etuel nso bᴐbea ne εboᴐ mu. Ↄkyerε sε, saa

abosom yi a yεabobᴐso yi nyinaa firi Oguaa kuro no mu. Sε eduru afahyε biara nso a saa

abosom yi di akutene saa berε no paa

2.5.2 Abosom dwumadie

Peter (1974) kyerɛ sɛ, abosom wͻ dwumadie ahodoͻ a wͻdi. Amanfo agye atom, na

wͻsane de wͻn ho to so sɛnea wͻbɛboa wͻn, titirie ne wͻn a wͻyɛ mmerɛ wͻ honhom

fam ne berɛ a obi pɛsɛ wͻtietia wͻn fahodie so. Ɔtoaa so sɛ, abosom na ɛtumi kyerɛ obi

hyɛbrɛ. Hyɛbrɛ no
gu ahodoͻ, obi deɛ yɛ asoͻmmerɛ, adwumayɛfo ne obi a ͻwͻ ͻdͻ. Ɔtoaa so sɛ ɛtͻ da a,

hyɛbrɛ tumi ne nea yjkyerɛ no nyinaa bͻ abira. Ɔtoa so sɛ, abosom tumi kyerɛ onipa

hyɛbrɛ. Bio ͻkyerɛ sɛ, abosom yɛ ahonhom bi a yɛmfa y'ani nhunu. Ɔtoaa so sɛ, abosom

gu ahodoͻ mmienu. Deɛ edi kan ne Yaawa anaa Asuo mu bosom ɛna deɛ ɛtͻ so mmienu

ne abosom Mmarafoͻ.

Soyinka W. (1964) Ka wͻ ne nwoma no mu sɛ; ′′ɛyɛ nokwarɛ sɛ nsuo kura ͻgyeɛ tumi

nwanwasoͻ bi′′. Ɔkaa bio sɛ ′′mmaa bi wͻ hͻ a wͻsom ɛpo, asubͻntene ne nsuwa ahodoͻ

a ɛwowͻ hͻ no, wͻgye di sɛ ne nyinaa fuafua sunsum mu tumi bi a ɛda ayeresabea ne

ͻgyeɛ ba′′.

Korsah La & Kuwornu (2019) kyerε sε, mpatu yareε bi yii ne ti mmere bi a atwam no,

na kuro no abosom hyεε wᴐn sε wᴐnfa nnipa mmogya na εnyi apaeε sεnea εhaw no to

bεtwa. ᴐmanfonom aniannye saa akwankyerε yi ho koraa nanso ᴐbarima bi tuu ne ho sii

hᴐ de bᴐᴐ saa afᴐreε yi maa abosom no. Na saa ᴐbarima yi de Ogua nti firi hᴐ no,

ᴐmanfoᴐ no hyεε aseε frεε baabi a na ᴐteε no sε Oguaman.

2.6 AHENSIE.

Ahensie yɛ Akanfoɔ amammerɛ a wɔnam so pa onipa titire a ɔsɛ fata ma no di ɔman bi

anim, anaa da ano sɛ ɔhene, Asomah, (2017). Authur, (2003) nso se ahensie yɛ ɔkwan a

Akanfoɔ nam so de obi si akonnwa a atɔ mpan so. Ɔkyerɛ mu sɛ, Akanfoɔ nni ho agorɔ

koraa, ɛfiri sɛ, wɔnim sɛ wiase yi wɔ wuranom, enti ɛsɛ sɛ obi hwɛ ɔman ne nnyapadeɛ a

nananom apɛ ato hɔ no so yie. Prempeh, (2003) kyerɛ mu sɛ, Akanfoɔ ahensie gyina

akonnwa ne wɔn anyamesom so. Yei nti berɛ biara wɔhia obi a ɔbɛtumi ahwɛ so, na
wasane agyina wɔn anan mu ne nananom adi nkutaho wɔ nsaguo anaa apaeɛ kwan so.

Ɔhene yɛ obi a ɔtumi wura baabiara ɛsiane ne tumi nti, na ɔnsuro nnipa animadeyɛ, na

ɔsane nim ahaban mu na ɔkɔ ne manfoɔ mmoa. Wɔsi ɔhene wɔ berɛ a akonnwa bi atɔ.

Asɛmfua “ɔhene” gyina hɔ ma onipa a ne ho yɛ hene. Yei kyerɛ sɛ baabiara ɔwɔ hɔ. Ɛwɔ

sɛ ɔhene yɛ onipa a ɔwɔ akokoɔduro a ɔtumi wura baabiara, na ɔmmɔ hu. Ɔhene no ne

kuro wura. Yei nti, ɔyɛ ɔkannifoɔ wɔ adeɛ nyinaa mu sɛ ebia; ɔsakorɔ mu, afahyɛ mu,

ɔman no tiri so mmusuyie mu, ne ɔman no mpuntuo mu. Asomah, (2017).

Ɔhene yɛ onipa a ɔfiri adehyebusua mu, na ɔwɔ suban ne akokoɔduro, na aduru ne so sɛ

ɔdi adeɛ, na abusua ne ɔmanfoɔ ate ase sɛ wɔmma no nni wɔn so sɛdeɛ ɛbɛyɛ a wɔn man

no bɛtu mpɔn. Sɛdeɛ ɛnam obi so na yɛbɛduaa baabi a yɛwɔ yi no, saa ara nso na ɔman

biara wɔ sodifoɔ.

2.7 Tɔfabɔ

ɔfa yi kyerɛ sɛdeɛ animdefoɔ binom akyerɛ wɔn adwene afa abakɔsɛm, Akanfoɔ

mmusuakuo, ahensie, abosom ne akyiwadeɛ ho.