1

Dai Teng Man Ai Gaw Nanhte Hpe Shalawt Na Ra Ai.

Yawhan 8:31-32 “Nanhte nye a ga hta agrin nga myit yang gaw, nye a sape teng teng nanhte tai
nga myit dai: tengman ai lam mung nanhte chye lu na marin dai rai nna, dai tengman ai gaw nan-
hte hpe shalawt dat na ra ai”.
Ga Hpaw: Yesu a hpang hkan ai ni yawng hpe sape ngu shamying ai re. Rai tim, Yesu dinghta
mungkan asak hkrung ai aten hta Shi a hpang hkan ai ni lachyum amyu myu, myit mada lam amyu
myu hku hkan nang ma ai. Yesu lata la ai sape 12 nan mung Yesu hpe chye na ai lam amyu myu,
lachyum htai la ai lam amyu myu, myit mada ai lam amyu myu hte hkan nang ma ai re. Ga
shadawn -Yuda Iskarut Yesu a hpang hkan ai lam gaw amyu mi rai nga ai. Yesu rim la hkrum ai
shaloi mung sape ni yawng hprawng mat ai re. Petru gaw masum lang nyet kau ai re. Dai lam ni
a majaw Yawhan8:31-32 hta Yesu gaw tengman ai sape tai ai lam gaw hkrit tsang ra ai baw, sum
machyi mat wa ai baw, lachyum n pru mat wa ai baw n re ai sha, lam shagu hta shalawt dat ya ai
hkrum ai asak hkrunglam lu la ai lam she rai na re ngu, numhtet ga tsun da ai lam rai nga ai.

I. Teng Man Lam Ngu Ai Hpa Baw Hpe Tsun Mayu A TA?
Tengman ai: Myit mang ai, tsun shaga ai, galaw gun hpai ai lam ni hta shut shai ai lam n nga ai;
ga sadi ni galoi mung n hten, n mat ai. Tara rap ra ai, htuk ai, myit malang ai, myit matu ding ai,
htep lahti re ai lam re.
Tengman dinghpring ai a lachyum: Karai Kasang chyu sha htani htani tengman ai wa re
(God is the truth) (Yawhan 14:6; Titu 1:2, Roma 3:4, Heb 6:18). Yesu mung Shi gaw tengman ai
wa re lam tsun da ai (Yawhan 14:6). Karai Kasang gaw tengman ai lam re, tengman nga ai wa
mung re. Shi a machye machyang, yaw shada ai lam ni hte galaw ai magam amu ni yawng gaw
shut shai ai lam nnga ai. Aten shagu hta tengman nga ai hte hkum tsup nga ai. Yh 17:3 hta Karai
Kasang gaw tengman ai hte langai sha re ai Karai Kasang re ai lam Yesu tsun ai. Shi a ga sadi ni
galoi mung n hten, n mat ai hte, n hkum tsup ai sha nga ai wa n re ai. Shi a mungga ni mung shut
shai ai lam nnga ai, aten shagu hta tengman nga ai.
Shinggyim masha ni hkum tsup kup hkra tengman dinghpring hkra tinang a atsam hte n shakut lu
ai. Kam sham ai hte, K.K hte kyu hpyi kanawn mazum let, madat mara ai lam hta shakut shaja
asak hkrung ai lam hta mahta nna she, K.K masat ya hkrum ai hku nna tengman dinghpring ai wa
tai wa lu ai re. (Esai 50:9; Roma 3:4-5; 9:31-32; 10:3-4; Gal 3:11-12).
Hpa majaw tengman ding hpring ra a ta?:- Karai Kasang Shi nan dinghpring ai hku madun dan
ai hte maren shinggyim masha ni dinghpring na hpe sharawng awng ai K.K re (Yeremia 9:24).
Tengman ding hpring ai gaw,`Hkrang bungsumla a ahkawng ahkang hte manu re.
Tengman dinghpring ai masha a maka kum la:-Yubak mara a lam atsawm chye na
hkawn hkrang ai hte, K.K hpe tsep kawp kam sham ai wa re (Mt. 5:36; Mk 2:17; Lk 18:14). Kam
sham ai a marang e dinghpring ai wa ngu K.K masat ya na hpe shagroi gara ai hte, K.K a chyeju a
jaw e tengman dinghpring ai lam hta galu kaba wa ai wa re. (Rm 6:12-18: Eph 4:24; 5:9; Phil 1:11;
Heb 11; Yaku 2:17-26; I Pet 2:24; I Yh 2:29).
Tengman dinghpring ai a akyu ara: Tengman dinghpring ai wa gaw kam sham ai hte hkrung nga
lu na (Habaku 2:4b); A lu ai hte hkru kat wa na (Mt 5:6); jet ai sape tai lu ai, tengman lam hpe chye
lu ai, tengman lam a shalawt la hkrum ai chyeju hta nga pra lu ai (Yh 8:31-32). Udat shara mu na,
asak hkrung lu ai hte nhpaw n-ya lu la na (Yh. 10:10). Kyu hpyi ai ga hpe K.K madat ya ai (I Pet
3:12). Kabu gara ai hte shaman chyeju ni lu la na (Sh.K 45:7-8).
II. Yesu Shalawt Dat Ya Hkrum ai Sape Tai Nga Na Matu
(a) Tengman ai makam masham nga ra ai.
 2

Marai langai ngai gaw, Yesu htawn tsun ai lam yawng jaw ai, tengman ai ngu nna hkap la kam
sham ai aten kaw nna, Yesu a sape tai hpang wa ai re. Yesu htawn tsun ai Karai kasang a lam,
Karai Kasang a tsaw ra myit, yubak mara a lam, ngarai a lam, hkye hkrang la ai lam, sum sing
mungdan a lam ni hpe chye na nna, Yesu hpe tinang a hkye la madu hku hkap la kam sham ai lam
kawn hpang ai lam re. Karai Kasang a lam chye chyang ai lam hta lani hte lani grau grau kung
hpanwa ai, Karai Kasang a daru magam hpung shingkang hte mai kaja ai lam hpe shani shagu myit
masin kaw na hkam sha lu ai lam grau grau kung hpan wa ai, Karai Kasang sharawng awng ai hku
asak hkrung mayu ai lam grau grau kung hpan wa ai, Karai Kasang a hpung shingkang a matu
shani shagu ta tut asak hkrung ai lam hta grau grau kung hpan wa ai lam ni gaw tengman ai makam
masham a shingni maka ni rai nga ai.
(b) Karai Kasang a mungga hta agrin nga ai.
Karai Kasang a mungga hta agrin nga ai wa gaw (1) shani shagu Karai Kasang a mungga hta ma-
dat mara nga ai wa re. Shi prat hpe gaw gap ai lam yawng gaw, kam sham ai hte mungga hpe ma-
dat mara ai lam hku sha madung dat gaw gap nga ai wa, mungga hta grin nga ai wa re. (2) Shani
shagu Karai Kasang a mungga hpe sharin la nga ai wa re. Chyum laika hti hku, mungga madat ai
hku, sharin hpawng ni hku nna Karai Kasang a mungga hpe grau grau chye na hkawn hkrang hkra
shakut shaja nga ai wa gaw mungga hta grin nga ai wa re.
(i) Karai Kasang a mungga hpe shani shana myit mang ai wa re. Tinang a lai wa sai aten, ya na
aten, du na ra ai aten hte seng nna Karai a mungga hta la kap let shani shana myit mang ai wa gaw
mungga hta grin nga ai wa re.
(ii) Karai Kasang a sharawng awng ai lam hpe yin la let madat mara hkan sa nga ai wa gaw
mungga hta grin nga ai wa re.

(C).Tengman ai sape tai na matu tengman ai lam hpe chye na hkawn hkrang manu shadan
tsaw ra ai.
Masha a sak hkrung lam a lachyum, manu, ahkaw ahkang, akyu ara ni hpe tengman ai hku chye na
ai wa she tengman ai sape tai lu ai re. Mungkan hta shinggyim masha ni masat ai tengman lam ngu
ai amyu myu nga ai re. Nkau myi mungkan hpaji hpe madung dat ma ai. Nkau mi, mungkan
arawng aya hpe madung dat ma ai. Nkau mi mungkan sut rai hpe madung dat ma ai re. Rai tim,
hpanda ai Karai a lam hte, Karai a hpan da ai yaw shada lam chye ai wa chyu sha tenmgan lam
majing hpe chye na hkawn hkrang ai hte manu shadan tsaw ra chye ai re. Chyum laika hta, akyu
hpyi let KaraiKasang a hpung shingkang a matu shani shagu asak hkrung ai hku nna, Karai Kasang
hte tut nawng kanawn mazum nga ai wa chyu sha, sak hkrung lam a lachyum, manu,
ahkaw ahkang, akyu ara ni hpe tengman jaw ang ai hku chye na lu nna, Karai Kasang hpe tsaw ra
kungga ai, tinang hkum tingang manu shadan tsaw ra ai, hpanda ai nga yawng nga pra hpe tsaw ra
manu shadan ai wa tai wa lu ai re.

III. Tengman ai sape gaw Hkristu hta shalawt dat hkrum ai wa rai na.
“Dai tengman ai gaw nanhte hpe shalawt dat na ra ai” ngu tsun da ai hte maren, tengman ai sape ni
gaw Yesu Hkristu a marang e lam 4 kawn lawt lu ai chye ju lu la ai re.
(a) Hkrit myit kaw na lawt lu ai: Tengman ai sape gaw mungkan ntsa hta tinang hkrai asak hkrung
nga ai n re hpe atsawm chye ai. Karai Kasang hte rau sak hkrung nga ai majaw, Karai Kasang a
hpung shingkang npu hta hkrung nga lu ai majaw mungkan hpe n hkrit sai. Tinang myi gawngkya
ai wa, nhkum tsup ai wa rai tim, Karai a kashu kasha re majaw, Karai a yu lahku bau maka ai
chyeju hta nga pra lu ai hpe chye ai majaw hkrit myit kaw na lawt lu ai lam re. Si ai hkaraw a
 3

shingnip hta hkawm sa wa nga ra ai aten hta rai tim, htani htana asak lu da ngut ai wa re majaw,
hkrit myit kawn tawt lai lu ai wa tai nga lu ai re.
(b) Tinggyeng machyu ai kaw na lawt lu ai: Masha dingsa (sh) shingra tara hta sha machyu ai wa
gaw tinggyeng machyu ai hku asak hkrung ai re. Rai tim tengman ai sape gaw, Yesu Hkristu hpe
prat ting/prat tup a matu kam hpa manoi ai wa re majaw tinggyeng machyu nna asak n hkrung sai
sha, Yesu Hkristu hta ningnan hpan da hkrum ai masha (sh) Hkristu hta ningnan tai ai masha hku
asak hkrung ai re. Tinang a matu numbat langai n myit ai sha, Karai Kasang sharawng awng ai
lam, Karai Kasang ahpung shingkang a matu she numbat langai tawn let prat hpe lachyum hpyan
manu shadan gaw gap asak hkrung ai re. Chyoi Pra ai wenyi a up hkang lam woi matsun madun ai
lam hta prat hpe gaw gap ai wa rai nga ai.

© Shinggyim masha hpe kam hpa manoi ai prat kaw nna lawt lu ai: Dinghta mungkan a sat
lawat gaw masha langai ngai, ah na lu ai (sh) arawng aya lu ai wa langai ngai kaw kat hpa yat hpa
rai ahkaw ahkang a matu asak hkrung ai re. Masha dingsa (sh) shingra tara hta sha naw asak
hkrung ai wa gaw dai zawn kat hpa yat hpa rai ahkaw ahkang lu tam la ai hpe arawng la ai, kabu ai
re. Rai tim tengman ai sape gaw, Karai Kasang chyu sha yawng mayawng hpe dang di lu ai, Karai
Kasang shagrau shatsaw la ai chyeju chyu sha manu dan ai hpe chye na kam sham ai wa re. Dai
majaw, dai wa a asak hkrung lam hta Karai a hpung shingkang hpe grau grau mu mada lu ai,
makam masham grau kaba jat wa lu ai, Karai Kasang a man hta grau tengman dinghpring ai hku a
sak hkrung lu ai re.
(d) Yubak mara kaw nna lawt lu ai: Tengman ai sape gaw yubak mara ngu ai hpe atsawm chye
na ai hte, yubak hpe matsat ai sha n-ga, yu bak lam hpe kau da lu ai, kabai da kau lu ai wa re.
Agung alau hpe Karai Kasang hpe kam sham ai chyeju hte dang manga lu ai sha n –ga, Karai
Kasang a hpung shingkang a matu asak hkrung lu ai wa tai nga lu ai re.

Ga Hpugndim: Karai Kasang gaw shinggyim masha yawng hpe Hkristu hta shanglawt ai ni tai
nga shangun mayu ai re. Tengman ai sape tai let dai chyeju hpe tinang nan hkam sha lu ai sha n-ga,
mungkan de gam ginlen jaw ai ni tai nga na matu kam sham ai ni hpe chyeju jaw nga ai. Tengman
ai sape tai let shanglawt chyeju hpe mungkan de gam ginlen jaw nga ga! To God Be The Glory!

Ginlen shalai ai,

Lahpai Awng Li (Ph.D)